Orang Marah vs Orang Laper

Malam ini Bang Naip lagi kepengen rilek istirahat abis seharian ngojek di daerah jakarta selatan nyang semakin rame ajeh… enggg.. engga denk!… sampe nganterin “customer” ke daerah jakarta pusat juga, di daerah stasiun Pasar Senen juga kok… terpakse routenye ngitir-ngitir lewat jalan tikus biar kagak macet.
Tempat nyang paling asyik buat bang Naip rilek ade di pos ronda ujung gang rumahnye, ujung jl. kampung melayu kecil tebet. Apelagi ade Rojak lagi, udeh nagkring duluan. Waktu masih nunjukin jam 09.15 nech, karena kagak hujan berhari-hari… cuaca panas banget dah. Sholat Isya udeh, makan udeh, nonton tipi …kagak ade nyang asyik. Bang Naip cuman pake baju kaos tangan buntung ame celana jeans doang jalan ke pos ronda. Si Rojak sambil maen gitar bututnye.
Bang Naip, ” Jak, elu kagak bosen2nye nongkrong di mari!…”
Rojak, ” Iye bang…pan ane nungguin abang buat berbagi cerite…hehehe”
BN, ” Emang elu ade cerita apaan nech..”
R, ” Ade aje sech bang…”
BN, ” Apaan tuh”
R, ” Begini, bang….temen aye si Mamat cerite, tadinye dia pake tebak2an, bang. Dia bilang, mendingan mane Jak, orang lagi marah atau orang lagi laper? Begitu, bang”
BN, ” Nah elu jawab ape?”
R, ” Aye bilang mendingan orang laper, bang…kalo orang marah-marah, pan kite bingung ngeladeninnye. Kalo orang laper kan, begitu dia makan, selesai deh”
BN, ” Terus, Jak… “
R, ” Eeeh…ane diketawain, bang ame si Mamat”
BN, ” Lahh…”
R, ” Iye,bang…terus dia nyahut, dia bilang elu salah Jak…yang bener mendingan ngeladenin orang marah daripade orang lapar. Sebabnye, kalo orang marah, kite minta maap, urusan selesai. Naaa… kalo orang lapar… bawaannye khan uring2an kagak tau juntrungannye… marah2 ame siape ajeh yang dia temuin…. kalo dia masuk rumah… bininye langsung kagak salah kagak ape maen dimarahin, anaknye baru bangun tidur langsung kena damprat… wuuuuooh… biar kate udah makan juga masih uring2an juga. Orang kate… syaithon lewat ajeh bisa dimakan ama orang kelaperan… hehehehe…”
BN, “…Hahahaha… bener Jak… bener itu si Mamat… gue sering ngalamin seperti itu kemaren2…..hahahahha…!”
R, “???????!!!!!!”