Mana Cicek, Yang Mana Buaye

“Kucing kurus mandi di kolam, buaye timbul disangke mati….”
“Salah urus jadi runyam, kapan biang buaye timbul kita nanti-nanti….”
Hehehe… Bang Naip terinspirasi ame lagu almarhum Benyamin S, dari album lamanye nyang berpantun2 kayak kalimat di atas nyang udeh dimodifikasi.
Soalnye Bang Naip bingung ame berita2 di koran, di tv, di internet. Doi kagak abis pikir, entu para bos2 negare pade ngaku bener semue, pade kagak ngaku salah semue.
Nyang atu bilang si anu begini, si una begono. Masing2 punye alibi. Masing2 pade ngaku suci2 ajeh kayak lagu Putih Melati ciptaan Bang Guruh Soekarnoputra.
Udeh gitu ditambah penjelasan keder2 tentang nyang mane buaye, nyang mane cicek. Kalo kate Tim 8, jadi bikin kagak jelas “substansi” nye. Woouuw… Bang Naip geleng2 sambil megang koran Pos Kota.
Daripade pusing2, mendingan Bang Naip baca rubrik iklan deh di Pos Kota. Lumayan dah, siape tau ajeh ada rejeki, jadi calo jual beli kendaraan nyang ditawarin dikoran entu. Amiin…