Bedah Kuliner: Soto Ayam Jalan Ambengan 3A Surabaya

pak sadi asli

Ini cerite dari sahabat, namanye Bang Wiskul:
Emang dasar nasib Bang Wiskul lagi baek. Kesampean juga cita2nye nyobain Soto Ambengan nyang asli di Jalan Ambengan No. 3A Surabaya. Secara di Jakarta, soto entu nyang pake tambahan merek “pak sadi asli”, buka cabang ato franchise dimane2. Ade nyang di Jalan Wolter Monginsidi kebayoran, di daerah Lapangan Ros Casablanca Tebet, Jalan Cikini Raya depan TIM en tempat2 laennye.
Dalem atu kesempetan, bang wiskul nyampe juga makan malem di jalan ambengan surabaya. Berhubung jalan ambengan entu 2 arah terpisah, bang wiskul dari hotel tunjungan ngelewatin jalan tikus ke daerah belakang soto ambengan pak sadi entu, ngelewatin jalan Jaksa Agung Suprapto, trus ketemu perempatan ame Jalan Ambengan. Ampir ajeh bang wiskul nyasar atawa salah masup kamar eh…. salah depot.

bakwan & mie ayam bukan Pak Sadi

Nyasar ke depot di sebelah kanannye nyang buka bakwan en mie ayam pangsit, nyang cuman ade pengunjungnye sepasang kekasih. Untung doi sempet ngeliat sekelebat spanduknye… eh ternyata bukan soto. Secara hari entu malem minggu. Bisa jadi, depot soto pak sadi asli ini kagak bisa disebut depot kali yee, bisa kite bilang tampilan tampak luar entu kayak rumah makan lah. Soalnye soto ambengan pak sadi asli ini, pake ruang ber AC en tertutup kaca begitu.
Soto ayam Ambengan emang penganan khas kota Surabaya dah.

baliho

Begitu masup ruangannye asyik juga nech, konsepnye model warungan begitu. Di sebelah kiri depan di sebelah kasirnye, ade tempat tukang ramunye ngeracik bumbu en daging buat diseduh ame kuahnye nyang ngebul2 di gerobak pikulannye entu.

courtesy surahyo-kulinerdotblogspotdotcom

Dari depot soto ayamnye Pak Sadi ini, nama ambengan jadi terkenal, secara udeh berdiri dari taon 1970. Lokasi nyang sekarang ini ditempatin ame pak haji Sadi, orang Lamongan Jawa Timur entu dari taon 1974. 3 taon sebelonnye doi nempatin depotnye di pinggir jalan Achmad Jaiz Surabaya. Pak Sadi udeh dagang dari umur belasan taon pake gerobak dorong, jualan makanan keluar masuk kampung Surabaya. Cabang Jakarta nyang di wolter monginsidi dibuka dari taon 1989.

courtesy azuyadotmultiplydotcom

Soto ini terkenal ame rasa koya sotonye nyang khas banget. Warne kuahnye juga rada laen dibandingin soto dari daerah laennye. Airnye lebih berwarne kuning kepekatan en kentel2 gitu, sebab resep pak sadi bikin kuah sotonye pake kunyit. Naa didalem kuah entu, ade daging ayamnye, jeroan, kulit, ame brutu ayam, telor, bihun, kubis cacah sekalian kuah kaldu ayam deh. Semuanye pake ayam kampung tuh.

soto koya ambengan

Ame pelayannye sebelon dipesenin soto ambengan, kite ditanyain dulu, mau nasinye dicampur ke kuah ato nasinye dipisah. Jadi tergantung selara kite nech. Udeh gitu, para “soto lovers” senengnye nyampur entu soto ame koya. Koya entu sebenernye campuran bubuk dari parutan kelapa, tumbukan kerupuk udang, en bawang putih. Trus aksesori nyang nemenin soto kite entu, ade kerupuk, ade sambal , en jeruk nipis. Ade juga nyang nambahin kecap manis atawa kecap asin disesuaiin ame kite punye selera ajeh deh.

courtesy iddotwikipediadotorg

Kalo soal rase….. wuahhh emang rada beda ame soto ambengan nyang di betawi dah. Bisa jadi campuran kuahnye udeh ditambahin koya duluan kali yee. Rada2 unik tapi “taste” soto emang “dalam” banget dah….. seger2nye soto entu kali ye. Suseh dibilangin dalem kate2….saking gurihnye!!

sirop blewah dingin

Giliran pesen minumnye, bang wiskul kepengen nyang seger2 en di jakarta emang suseh nyarinye, sirup en blewah dingin. Secara kalo di jakarta adanye blewah entu cuman di musim bulan puase ajeh. Waduuuh…. begitu dateng entu pesenan blewah seger…. “emang suegerrrrrr tenan..rek,” kalo kate arek suroboyo sini nech.